Vakre Lise!

Mi vakre venninne Lise er no komen i blomst igjen. Ho har streva seg gjennom ein mørk og kald vinter og håpa på å få nok omsorg til å blomstre på nytt. Og no har ho klart det! Med 3 blomster og mange knoppar står ho i vindaugskarmen og nyt den lysare årstida. Velkommen tilbake Flittige Lise!

Vårpust....

No når snøen har lege her heilt sidan før jul med sitt kvite lag over alt, så er det herlig å sjå alle desse vårfargane. Eit knalltilbod hos Plantasjen med Primula til kr 13 pr stk gjorde at eg kunne tillate meg å gå litt amok. Omtrent som eit barn i ein godtebutikk på svenskegrensa!

Men med morsdagar i sikte så fann eg ut at eg kunne kjøpe så eg hadde å gi bort. Fann svarte avlange potter med plass til to potter, så dette skal bli presangar som eg skal overlevere snart. Om eg ikkje ventar til "rette" dagen, så syns eg det ikkje gjer noko, for ei mor treng no all ære ho kan få uansett dag! Og aller helst kvar dag!

Midtsommarblomster

Det er sommar på kalendaren, juni er godt i gang og Reiseradioen har starta. Eit sikkert tegn på at det nærmar seg midtsommar er alle dei vakre markblomstrane. Ikkje noko er så fint og sommarleg som ein samansett bukett av desse.

Men noko viktig manglar,........VARME! Under 10 gr kvar morgon og max 12-14 gr midt på dag! Nesten som ein varm dag i desember. Denne veka har eg ferie, ....og eg som hadde tenkt meg lange varme morgenstunder på frukostverandaen med Reiseradioen og litt quiltearbeid i solskinet.

Men ein ting er iallefall sikkert, no kan det kun bli varmare her på Vestlandet!!

Ønsker alle som er innom ein varm sommardag!!

50 ÅR!!!

Hurra for mine foreldre, 1. mars hadde dei vore gifte i 50 år! Gullbryllaup! Eg har vore i gullbryllaup ein gong før, då var det mine besteforeldre som feira dagen, eg tykte dei var veldig gamle då!!! Men som eg sa til mor mi i går, - "de virkar ikkje så gamle som besteforeldra mine var".


Mor mi var 21 år då ho gifta seg, og hadde dåtidas mote i brudebukettar.

Brudeslør med rosa nellikar.

Eg hadde planlagt at vi syskena skulle gje dei ein kopi av brudebuketten, og laurdag la eg i veg til blomsterbutikken for å få laga ein bukett. Etterkvart oppdaga eg at eg burde ha bestilt blomster på forhånd, slik at eg var sikker på å få det eg ville ha, for store rosa nellikar var ikkje råd å finne. Heller ikkje avskorne brudeslør! Så då er det bra eg er ein optimist som likar å vere kreativ og prøve sjølv.



Det enda med at eg kjøpte ein potteplante med brudeslør, den einaste som var til sals i kommunen!! Rosa greinnellikar og litt grønt vart sett saman til ein foreløpig bukett, og så drog eg heim for å vere brudeblomster-dekoratør.

Kjøpte med meg ei nydelig grårosa silkesløyfe, eit gullhjerte av streng og fin cellofanplast til bukettar. Litt spent var eg på kor dette ville gå, ikkje kvar månad eg har ferske blomster å lage bukettar av!Og slik vart den ferdige buketten!